ប្រើឈ្មោះអ្នកធំ

១២- ប្រើឈ្មោះអ្នកធំ

អត្ថបទទី ៨, ខ្លឹមសារនេះ គឺនិយាយពីការប្រើឈ្មោះអ្នកធំ ដោយមានកន្លែងមួយ សត្វចចកយកឈ្មោះមេរបស់ខ្លួនទៅគំរាមគំហែងសត្វគោសញ្ជីវកៈ ហើយខ្ញុំបានដាក់ចំណងជើងថា "ប្រើឈ្មោះអ្នកធំ" ។ សូមសាធុជនអានលេងកម្សាន្តជាមួយគ្នាដូចតទៅ ៖

ចៀមពាក់ស្បែកខ្លា អាចប្រើចំពោះអ្នកមានអំណាចតិច តួនាទីតូច ឬគ្មានទាល់តែសោះ តែយកឈ្មោះគេមកប្រើ ដើម្បីបង្កើតអំណាច ទាញផលប្រយោជន៍ ។ ការចេះប្រើឈ្មោះអ្នកធំ មិនសុទ្ធតែអាក្រក់នោះទេ សំខាន់ចេះប្រើ ចេះចាប់ឱកាស ។ ឧទាហរណ៍ថា ជាប់សែស្រឡាយអ្នកធំ អ្នកមានអំណាច យើងគួរយកឈ្មោះនេះ មកកសាងសមត្ថភាពខ្លួនឯងឲ្យខ្លាំង ព្រោះកន្លែងការងារបើគេដឹងថា យើងជាប់ខ្សែអ្នកធំ គេច្រើនផ្តល់ឱកាសឲ្យយើងពេញដៃ ។ ដោយឡែកនៅក្នុងនេះ គឺនិយាយពីការយកឈ្មោះអ្នកធំដើម្បីអំណាច ដូចមានរឿងសង្ខេបនេះ ។

សត្វចចចក បន្ទាប់ពីទទួលបញ្ជា ពីសត្វសីហៈហើយ ក៏ដើរទៅស្វែងរកគោសញ្ជីវកៈ ហើយគំរាមគំហែងដោយប្រើឈ្មោះម្ចាស់របស់ខ្លួនធ្វើជារនាំងបង្កើតអំណាច ដើម្បីបំភ័យថែមថា “នែ៎អាគោឧសភចង្រៃ! ឯងមកពីណា មិនដឹងទេឬអ្វី ព្រៃនេះស្តេចម្ចាស់អញឈ្មោះបិង្គលកៈ ឲ្យអញថែរក្សា? ឥឡូវនេះលោកសេនាបតីករដកៈ បង្គាប់អញឲ្យមកប្រាប់ថាឲ្យឯងចូលទៅរកលោកឆាប់ៗ បើឯងមិនព្រមចូលទៅទេ ចូរចៀសចេញពីព្រៃនេះឲ្យឆ្ងាញទៅ បើឯងរឹងទទឹងមិនព្រមស្តាប់ នឹងត្រូវទោសកំហុសដល់ក្តីស្លាប់មិនខាន, ឯងមិនដែលឮទេឬអ្វី? ម្ចាស់យើងក្រោធហើយ នឹងប្រើវិធីក្តៅក្រហាយណាស់” ។ សត្វគោសញ្ជីវកៈ ឮតែអំណាចគំរាមគំហែងដូច្នេះ ក៏ដើរញញាក់ញញ័រចូលទៅជិតដោយភ័យខ្លាច ក្រាបប្រណម្យសេនាបតីករដកៈដោយអស្តាង្គបាត ។

សម័យបច្ចុប្បន្ននេះ មានចៀមពាក់ស្បែកខ្លាជាច្រើន ដើរបោកប្រាស់សម្លុតគំរាម អួតអាង ដោយសំអាងថាខ្លួនជាទីប្រឹក្សាអ្នកនេះ ជាប់ខ្សែអ្នកនោះជាដើម, ចំណែកអ្នកតូចឮតែឈ្មោះពាក់នឹងថ្ងាស់មកញ័រដៃជើងបាត់ទៅហើយ ដូចជាសត្វគោសញ្ជីវកៈ ឮតែចចកលើកឈ្មោះសីហៈជាស្តេចសត្វមក ខ្លួនជាជនសាមញ្ញ គ្មានយសខ្សោយអំណាច ក៏ញ័រទទ្រើក លែងហ៊ានមាត់តវ៉ា ។

ជាយោបល់ បើជាប់ខ្សែអ្នកធំ គួរយកឱកាសនេះ ពង្រឹងសមត្ថភាពឲ្យខ្លាំង បើរៀនប្រឹងឲ្យចេះ បើរកស៊ីសន្សំទ្រព្យដោយវិធីត្រឹមត្រូវ ។ គួរជ្រាបថា កន្លែងការងារ ការរៀនសូត្រ ការរកទ្រព្យ គឺអ្នកពាក់ព័ន្ធមកបង្រៀនយើង ដឹកដៃធ្វើការ សហការណ៍រកស៊ី ដោយស្វ័យប្រវត្តិ ព្រោះអ្វី? ព្រោះយើងជាប់ខ្សែអ្នកធំ ដេកអេះតែក្បាលពោះក៏មានមនុស្សមកឲ្យប្រយោជន៍ដែរ ។ រីឯចៀមពាក់ស្បែកខ្លា បន្លំឈ្មោះធ្វើអាក្រក់ គឺរមែងទទួលផលអាក្រក់ក្នុងកាលៈទេសៈណាមួយមិនខានឡើយ ។ កុកតែងភ្លេចជង់ តែជង់មិនភ្លេចកុកឡើយ ។

.........................

សូមជួយកែតម្រូវបើសាធុជនឃើញចំណុចណាខុសប្រក្រតី!

សូមរង់ចាំភាគបន្ត !