សេចក្តីព្យាយាមគង់បានសម្រេចដូចប្រាថ្នា
និយមន័យៈ ការសន្សំបន្តិចម្តងៗអាចសម្រេចបំណងបាន ។
អត្ថាធិប្បាយ
ការងារគ្រប់បែបយ៉ាង សុទ្ធសឹងតែកើតឡើងពីសេចក្តីព្យាយាមទាំងអស់ ព្រោះថាបើមិនព្យាយាមធ្វើ ប្រាកដជាមិនបានទៅដល់គោលដៅទេ ។ ម្យ៉ាងទៀត សេចក្តីព្យាយាមជាឫសគល់នៃសេចក្តីសម្រេចគ្រប់យ៉ាង និងគ្រប់បំណងទាំងអស់ ។ សូម្បីតែការសិក្សាក៏យកសេចក្តីព្យាយាមជាបច្ច័យដើម្បីឈោងទៅចាប់នូវសេចក្តីសម្រេចសមតាមបំណងដែរ ។
ក្នុងន័យនេះទៀត លោកក៏គិតទៅដល់ការធ្វើបុណ្យសុន្ទរ៍ទានក៏ត្រូវមានការព្យាយាមធ្វើបន្តិចម្តងៗ រហូតដល់បានសម្រេចមគ្គផលសមតាមប្រាថ្នាដូចគ្នា ។ ឧទាហរណ៍ ៖
- សត្វកណ្ដៀរតូចមួយ ព្យាយាមពាំយកធូលីដីទៅគរទុកត្រង់កន្លែងមួយ យូរៗទៅក៏បង្កើតបានជាដំបូកមួយយ៉ាងធំ ។
- ជាងចម្លាក់ម្នាក់ព្យាយាមដាប់ផ្ទាំងថ្មដា បន្តិចម្តងៗ ទីបំផុតក៏លេចចេញជារូបភាពផ្សេងៗសមតាមបំណង ។
- អ្នកក្រខ្សត់ម្នាក់ខំប្រឹងសន្សំប្រាក់បន្តិចម្តងៗ យូរៗទៅក៏ក្លាយទៅជាពាណិជ្ជករយ៉ាងធំម្នាក់បាន ។
- យុវជនម្នាក់ ខំប្រឹងព្យាយាមសិក្សារហូតដល់បានជាបណ្ឌិតម្នាក់ ៕
No comments:
Post a Comment