កូនខ្មែរភាគច្រើនមិនស្គាល់ ‘មនុស្សល្អ‘

កូនខ្មែរភាគច្រើនមិនស្គាល់ ‘មនុស្សល្អ‘

មនុស្សល្អមិនឋិតលើ រូបស្អាត ចំណេះខ្ពស់ យសធំ ទ្រព្យច្រើន ពាក្យសរសើរ ឬពាក្យបង្អាប់នោះទេ មនុស្សល្អឋិតលើគិតល្អ និយាយល្អ និងធ្វើល្អ ដោយខ្លួនឯង។ 

#គិតល្អគឺ គិតមិនចង់បានរបស់ទ្រព្យឬប្រពន្ធកូនគេ១ គិតមិនបៀតបៀនឬចងគំនុំគេ១ គិតថាធ្វើបុណ្យបានបុណ្យ ធ្វើបាបបានបាប ឬយល់ថា សង្ខារធម៌សុទ្ធមិនទៀង ជាទុក្ខ មិនមែនខ្លួន១។ 

#និយាយល្អគឺ មិននិយាយកុហក១ មិននិយាយញុះញង់បំបែកបំបាក់គេ១ មិននិយាយជេរស្តីមើលងាយបន្តុះបង្អាប់គេ១ មិននិយាយពាក្យអត់ប្រយោជន៍១។ 

#ធ្វើល្អគឺ មិនសម្លាប់សត្វគ្រប់ប្រភេទ១ មិនលួចរបស់ទ្រព្យគេ១ មិនផិតក្បត់ឬមិនលួចមានសាហាយ១។ បើខ្មែរមិនយល់ឬមិនចេះចាំ នូវមេរៀននេះទេ ខ្មែររមែងសេពគប់មិត្តខុស និងធ្វើខុសដោយខ្លួនឯង។

ការរៀបរាប់ខាងលើនេះ ហៅថា កុសលកម្មបថ១០ 

#សីល៥ មនុស្សល្អរមែងមានសីល៥ មិនសម្លាប់ មិនលួច មិនផិត មិនកុហក និងមិនសេពសុរាឬគ្រឿងញៀន។ សីល៥និងកុសលកម្មបថ១០នេះ ព្រះពុទ្ធឱ្យយកមកវាស់ភាពជាមនុស្សល្អ ហៅថា មនុស្សធម៌។ 

Kong Vichea: “មនុស្សពូកែមានច្រើនរាប់មិនអស់ តែមនុស្សដែលរកបានដោយកម្រគឺមនុស្សល្អ“។