ឆ្លើយសំនួរ ញោម មុនី រដ្ឋ (តើនិស្ស័យអ្វីអាចសម្រេចអភិញ្ញា៥)?

 ឆ្លើយសំនួរ ញោម មុនី រដ្ឋ (តើនិស្ស័យអ្វីអាចសម្រេចអភិញ្ញា៥)? គឺយោគីដែលចម្រើនអារម្មណូប្បនិឈាន និងលក្ខណូប្បនិឈាន អាចមាននិស្ស័យចេះបាន។
អភិញ្ញា=ការដឹងដ៏ខ្ពង់ខ្ពស់ដែលកើតពីកម្លាំងឈានមាន៥យ៉ាងក៏មាន (បញ្ចាភិញ្ញោ) មាន៦ក៏មាន (ឆឡភិញ្ញោ)គឺ៖
១-បុព្វេនិវាសានុស្សតិញ្ញាណ= អាចរឭកជាតិមុនៗបាន។
២-ទិព្វចក្ខុ= អាចមើលឃើញរូបគ្រប់ទីកន្លែងបាន។
៣-ទិព្វសោត= អាចស្តាប់សំលេងគ្រប់ទីកន្លែងបាន។
៤-ឥទ្ធិវិធិ= អាចសម្តែងឬទ្ធិផ្សេងៗបាន។
៥-ចេតោបរិយញ្ញាណ= អាចដឹងចិត្តអ្នកដទៃបាន។
៦-អាសវក្ខយញ្ញាណ= អាចធ្វើកិលេសឱ្យអស់បាន។

ឆ្លើយសំនួរ ញោមស្រី ឧបាសិកា ស៊ា សុខឡន (តើសមាធិ និងវិបស្សនា ខុសគ្នាដូចម្តេច)?
-សមាធិ= សំដៅដល់សម្មាសមាធិ គឺការដំកល់ចិត្តតាំងមាំត្រូវល្អប្រពៃ បានដល់ដំណើរតាំងមាំស៊ប់នៃចិត្ត ដែលស្លុងជាប់ក្នុងអារម្មណ៍ដែលចិត្តត្រូវរំពឹងទៅនឹករក រហូតដល់កើតឈាន (តាំងពីបឋមជ្ឈាន រហូតដល់បញ្ចមជ្ឈាន)។
-វិបស្សនា= ប្រាជ្ញាពិចារណាឃើញច្បាស់នូវដំណើរសង្ខារធម៌តាមសេចក្តីពិត ដោយបកបញ្ញត្តិចេញទាំងអស់ ឃើញត្រឹមតែធម៌សុទ្ធសាធដែលស្ថិតក្នុងចរន្តនៃអនិច្ចំ ទុក្ខំ និងអនត្តា រហូតដល់ឃើញទុក្ខទោសនៃសង្ខារទាំងឡាយនោះថា ពិតជាទុក្ខដ៏ក្រៃលែងមែន។
អនុមោទនាធម្មទាន!