ការចាយលុយលឿនដូចចុច Skip Ad ក្នុង YouTube ចុចតែមួយភ្លែត បាត់អស់រលីងពីខ្លួន ដែលយើងម្នាក់ៗតែងតែជួប ឬបានឃើញផ្ទាល់ភ្នែក និងគួរឲ្យយកទៅពិចារណា។ ដូចជាសាច់រឿងនេះ មានមនុស្សពីរនាក់ធ្វើការក្នុងក្រុមហ៊ុនជាមួយគ្នា តំណែងដូចគ្នា ហើយរកចំណូលបាន ៤,០០០,០០០៛ ស្មើគ្នាជារៀងរាល់ខែ។
ម្នាក់ដំបូង ឱ្យតែដល់ថ្ងៃបើកលុយភ្លាម ទឹកមុខញញឹមបិទមាត់មិនជិត។
គេចាប់ផ្តើមដើរផ្សារ ទិញខោអាវថ្មីដែលបញ្ចុះតម្លៃ ៥០% បបួលមិត្តភក្តិទៅញ៉ាំស៊ុបប៊ូហ្វេ និងប្តូរទូរសព្ទស៊េរីថ្មីដោយបង់រំលស់។
គេគិតថា "ខំធ្វើការហត់ ត្រូវរង្វាន់ឱ្យខ្លួនឯងខ្លះ"។
ប៉ុន្តែត្រឹមថ្ងៃទី ១៥ នៃខែ ទឹកមុខញញឹមនោះប្រែជាស្រពោន ព្រោះលុយក្នុងកាបូបនៅសល់ត្រឹម ២០០,០០០៛ ខណៈថ្ងៃបង់ថ្លៃផ្ទះ និងថ្លៃទឹកភ្លើងជិតមកដល់។
ចំណែកម្នាក់ទៀត គេមិនមែនមិនចេះចាយទេ តែគេមាន "ប្រព័ន្ធ" ចាត់ចែងច្បាស់លាស់។
គេយល់ថាការរកលុយបានច្រើន មិនមែនមានន័យថា មានបានទេ បើមិនចេះរក្សាវាទុក។
ផែនការអនុវត្ត ដើម្បីដោះខ្លួនចេញពី "ភាពក្រដដែលៗ"បើអ្នកមិនចង់ឱ្យជីវិតហត់នឿយដូចការរត់ម៉ារ៉ាតុង តែលទ្ធផលនៅសូន្យដដែល ចូរអនុវត្តតាមជំហានទាំង ៣ នេះ៖
១. ឈប់ចាយតាម "អារម្មណ៍" ហើយប្រើ "ខួរក្បាល" គណនា
មុននឹងដកលុយទិញអ្វីមួយ ឈប់សួរថា "ចង់បានទេ?"
តែត្រូវសួរថា ទិញហើយ តើវាបង្កើតលុយឱ្យយើងវិញដែរ ឬទេ?
ឧទាហរណ៍៖ បើអ្នកចង់ទិញកាបូបយួរដៃតម្លៃ ៤០០,០០០៛ គ្រាន់តែដើម្បីឱ្យមើលទៅហឺហារ នោះអ្នកកំពុងខាតបង់លុយសុទ្ធ។
ផ្ទុយទៅវិញ បើអ្នកយកលុយ ៤០០,០០០៛ នោះទៅរៀនវគ្គជំនាញខ្លីៗ ឬទិញសម្ភារៈយកមកផលិតរបស់លក់បន្ត អ្នកកំពុងដាំគ្រាប់ពូជលុយឱ្យរីកដុះដាល។
២. បែងចែកលុយជា "កញ្ចប់" ភ្លាមៗ រូបមន្ត ៥០/៣០/២០
កុំយកលុយមកច្របល់ចូលគ្នាជុំតែមួយ។
បើអ្នករកបាន ៤,០០០,០០០៛ ចូរចាត់ចែងដូចខាងក្រោម៖
៥០% (២,០០០,០០០៛) សម្រាប់ចំណាយចាំបាច់ ផ្ទះ ម្ហូប ទឹកភ្លើង។ អស់ គឺឈប់ ចំណាយត្រឹមហ្នឹង។
៣០% (១,២០០,០០០៛) សម្រាប់ចំណាយតាមចំណង់ និងការអភិវឌ្ឍខ្លួន ដើរលេងខ្លះរៀនខ្លះ។
២០% (៨០០,០០០៛) សម្រាប់សន្សំ និងវិនិយោគ។
នេះជា "លុយសម្រាប់អនាគត" ដែលហាមប៉ះពាល់ដាច់ខាត។
៣. ឈប់ធ្វើជា "ទាសករទំនិញបញ្ចុះតម្លៃ"
ស្លាកបញ្ចុះតម្លៃ ៥០% មិនមែនមានន័យថា អ្នក "សន្សំបាន ៥០%" ទេ តែវាមានន័យថា អ្នក "ចំណាយអស់ ៥០%" ទៅលើរបស់ដែលប្រហែលជាអ្នកមិនចាំបាច់ត្រូវការផង។
បើរបស់មួយតម្លៃ ២០០,០០០៛ បញ្ចុះសល់ ១០០,០០០៛។
បើអ្នកមិនទិញ អ្នកសល់លុយ ១០០,០០០៛ ពេញនៅក្នុងហោប៉ៅ។
ប៉ុន្តែបើអ្នកទិញព្រោះតែវាថោក អ្នកបាត់បង់លុយ ១០០,០០០៛ ភ្លាមៗ។
ចងចាំទុក "លុយមិនស្រឡាញ់មនុស្សខំប្រឹងទេ... តែវាស្រឡាញ់មនុស្សឆ្លាត"។ ទោះអ្នករកបាន $៥០០ ឬ $៥,០០០ ក៏ដោយ បើរបៀបចាត់ចែងលុយបែបដដែល លទ្ធផលចុងក្រោយគឺ "អស់" ដូចគ្នា ខុសត្រង់តែអស់លឿន ឬអស់យឺតជាងបន្តិចប៉ុណ្ណោះ។
ការដែលអ្នកដឹងថា ខ្លួនឯងមានបញ្ហាគឺជាចំណុចចាប់ផ្តើមដ៏ល្អ។
ប៉ុន្តែការដឹងតែម្យ៉ាងមិនទាន់គ្រប់គ្រាន់ទេ អ្នកត្រូវមាន "ប្រព័ន្ធ" ដូចដែលបានរៀបរាប់ខាងលើ។
ឱ្យលុយទៅធ្វើការឱ្យយើង មិនមែនឱ្យយើងធ្វើការបម្រើលុយពេញមួយជីវិតឡើយ។
អរគុណអ្នកទាំងអ្នកអស់គ្នា ដែលតែងតែគាំទ្រ Money Buddy មករហូត! សូមជួយ Like, Follow និង Share ជាសាធារណៈ ដើម្បីចែករំលែកចំណេះដឹង ហិរញ្ញវត្ថុដល់បងប្អូនកម្ពុជាទាំងអស់គ្នា! 
ពួកយើងអានរាល់មតិយោបល់របស់បងប្អូនជានិច្ច ចូលរួមចែករំលែកគំនិត និងបទពិសោធន៍របស់បងប្អូននៅក្នុង Comment រាល់ការចូលរួមសុទ្ធតែជាកម្លាំងជម្រុញទឹកចិត្តដ៏សំខាន់ដែលធ្វើឲ្យពួកយើងមានកម្លាំងចិត្តបន្តបង្កើតមាតិកាល្អៗជាច្រើនទៀត។
