យល់ច្បាស់ពីអារម្មណ៍ដែលត្រូវក្រោកពីគេងទាំងបង្ខំ រួចប្រញាប់ប្រញាល់ទៅកន្លែងធ្វើការ ដើម្បីដោះដូរញើសឈាមជាមួយប្រាក់ខែមួយកញ្ចប់នៅដាច់ខែ។ ពេលខ្លះយើងហត់ ហត់ទាំងកាយ ហត់ទាំងចិត្តយើងមានអារម្មណ៍ថាដូចជាម៉ាស៊ីនដែលគេបញ្ជាឱ្យវិលតាមម៉ោងកំណត់។
ប៉ុន្តែ ឈប់សិន ទោះបីជាខ្លួនយើងកំពុងបម្រើការឱ្យគេ ក៏មិនមែនមានន័យថា យើងត្រូវបោះបង់ក្ដីស្រមៃចោលនោះដែរ បេីយេីងចេះរៀបចំជីវិត។
១. រូបមន្តបែងចែកញើសឈាម ឱ្យក្លាយជាទ្រព្យ
ការគ្រប់គ្រងលុយកាក់មិនមែនជារឿងស្មុគស្មាញដល់ថ្នាក់រៀនមិនចេះទេ បងប្អូនគ្រាន់តែត្រូវមានវិន័យបន្តិច។
យើងប្រើគោលការណ៍ ៥០-៣០-២០ ដែលបត់បែន៖
៥០% សម្រាប់តម្រូវការចាំបាច់ ថ្លៃផ្ទះ ទឹកភ្លើង អង្ករ ម្ហូបអាហារ និងការធ្វើដំណើរ។
ផ្នែកនេះហាមលើសដាច់ខាតបើលើស យើងនឹងដង្ហក់។
៣០% សម្រាប់ភាពរីករាយ ចូលរួមការងារសង្គម បុណ្យទាន ការជួបជុំមិត្តភក្តិ ឬកាហ្វេបន្តិចបន្តួច។
យើងធ្វើការដើម្បីរស់ មិនមែនរស់ដើម្បីតែធ្វើការទេ ដូច្នេះត្រូវឱ្យរង្វាន់ខ្លួនឯងខ្លះ។
២០% សម្រាប់អនាគត សំខាន់បំផុត នេះគឺជាគ្រាប់ពូជ ។
ក្នុងនោះ ១០% ទុកសម្រាប់សន្សំក្នុងគ្រាអាសន្ន និង ១០% ទៀតសម្រាប់វិនិយោគលើចំណេះដឹង ឬរបរតូចតាច។
២. ការគណនាដែលបងប្អូនត្រូវដឹង ស្វែងយល់ពីថាមពលនៃពេលវេលា
ឧបមាថា បងប្អូនមានប្រាក់ខែ ៤០០ ដុល្លារ ហើយបងប្អូនតាំងចិត្តសន្សំឱ្យបាន ១០% គឺ ៤០ ដុល្លារ ក្នុងមួយខែដើម្បីវិនិយោគ៖
ឆ្នាំទី ១៖ ៤០ ដុល្លារ x ១២ ខែ = ៤៨០$ ប្រហែលជាមើលទៅតិចតួច
ឆ្នាំទី ៥៖ បើបងប្អូនយកលុយនោះទៅដាក់ក្នុងគណនីសន្សំមានកាលកំណត់ Fixed Deposit នៅធនាគារក្នុងស្រុកដែលឱ្យការប្រាក់ប្រហែល ៦% ក្នុងមួយឆ្នាំ៖
សរុបលុយដើម ២,៤០០$
ការប្រាក់សមាស Compound Interest បូកបញ្ចូលគ្នា បងប្អូននឹងមានលុយជិត ២,៨០០$ ក្នុងដៃ។
ចុះបើបងប្អូនយក ១០% នោះមកវិនិយោគលើខ្លួនឯង?
រៀនជំនាញបន្ថែម ដូចជាភាសា ឬបច្ចេកទេសលក់។
ពីប្រាក់ខែ ៤០០$ បងប្អូនអាចឡើងដល់ ៦០០ ឬ ៨០០$ ក្នុងរយៈពេល ២ ឆ្នាំ។
នេះហើយជាដំណើរការនៃការបង្កើនតម្លៃខ្លួន។
លទ្ធផលសរុបមិនមែនគិតតែលើលេខក្នុងកុងធនាគារទេ តែវាជាសមត្ថភាពដែលគ្មានអ្នកណាអាចមកដណ្ដើមពីយើងបាន។
៣. បរិបទការងារ កុំឱ្យគេជិះសេះលែងដៃ
នៅក្នុងកន្លែងធ្វើការ យើងត្រូវធ្វើជាបុគ្គលិកគំរូ។
ធ្វើការឱ្យអស់ពីសមត្ថភាពក្នុងម៉ោងការងារ ព្រោះវាជាក្រមសីលធម៌ និងជាកន្លែងដែលយើងដុះខាត់ជំនាញ ប៉ុន្តែ ត្រូវចាំថា
កុំយកការងារមកដាក់ក្នុងបេះដូងពេក បើក្រុមហ៊ុនជួបបញ្ហា គេអាចដកយើងចេញភ្លាម។
ដូច្នេះយើងត្រូវតែមានផែនការបម្រុងជានិច្ច។
បង្កើតបណ្ដាញទំនាក់ទំនង រាប់អានមិត្តរួមការងារ និងដៃគូខាងក្រៅ ទំនាក់ទំនងល្អ គឺជាស្ពានឆ្ពោះទៅរកឱកាសថ្មីៗ។
ការធ្វើការឱ្យគេមិនមែនជារឿងខុស ឬជារឿងគួរឱ្យខ្មាសអៀនទេ វាគឺជាដំណាក់កាលនៃការសន្សំទុន។
អ្វីដែលគួរឱ្យខ្លាច គឺការបណ្តោយឱ្យខ្លួនឯងលិចលង់ក្នុងវដ្តនៃប្រាក់ខែ រហូតភ្លេចសាងសង់ជម្រកផ្ទាល់ខ្លួន។
សូមកុំឱ្យគេគ្រប់គ្រងខួរក្បាល ដៃអាចធ្វើការឱ្យគេដើម្បីប្រាក់ខែ តែខួរក្បាល និងបេះដូង ត្រូវតែរក្សាទុកសម្រាប់អនាគតខ្លួនឯង។
អរគុណអ្នកទាំងអស់គ្នា ដែលតែងតែគាំទ្រ Money Buddy មករហូត! សូមជួយ Like, Follow និង Share ជាសាធារណៈ ដើម្បីចែករំលែកចំណេះដឹង ហិរញ្ញវត្ថុដល់បងប្អូនកម្ពុជាទាំងអស់គ្នា! 
ពួកយើងអានរាល់មតិយោបល់របស់បងប្អូនជានិច្ច ចូលរួមចែករំលែកគំនិត និងបទពិសោធន៍របស់បងប្អូននៅក្នុង Comment រាល់ការចូលរួមសុទ្ធតែជាកម្លាំងជម្រុញទឹកចិត្តដ៏សំខាន់ដែលធ្វើឲ្យពួកយើងមានកម្លាំងចិត្តបន្តបង្កើតមាតិកាល្អៗជាច្រើនទៀត។
