គប់មិត្ត

គប់មិត្ត

សៀវភៅស្រីហិតោបទេសនេះ ខ្ញុំជក់ចិត្តណាស់ អានហើយ អានទៀត កាន់តែអាន កាន់តែភ្លឺគំនិត ។ អានលើកនេះមិនដឹងជាទីប៉ុន្មានហើយទេ? ដូច្នោះក៏មានគំនិតចង់ចែករំលែក ។

ស្រីហិតោបទេស ជាបណ្តុំនៃគំនិត តែគួរកត់ចំណាំ គឺជាគំនិតប្រឆាំងគ្នាទៅមកៗ ប្រកបដោយគ្រឿងអាងរៀងៗខ្លួន ដូចអ្នកជជែកដេញដោលគំនិត មានគំនិតស្រប និងបដិសេធក្នុងសម័យបច្ចុប្បន្ននេះដូច្នោះដែរ តែក្នុងសៀវភៅនេះជ្រៅមហាជ្រៅជាង ។

គំនិតក្នុងសកម្មភាពនៃតួរឿងនីមួយៗសុទ្ធតែប្រកបដោយហេតុផល បើទោះជាតួនោះតំណាងឲ្យអំពើអាក្រក់ក៏ដោយ ក៏ហេតុផលល្អគួរយើងជឿស៊ប់ងប់ចិត្តតាមបាន ដូចបុរសស្រស់សង្ហា មានទ្រព្យ ប្រកបដោយសម្តីផ្អែម លួងលោមនារីឲ្យលង់ស្លុងតាមភ្លាមបាន ។

ដូចភាគទី១ និយាយពីការគប់មិត្ត ។ មិត្តមានពីរ គឺមិត្តល្អ និងមិត្តអាក្រក់ ។ មិត្តទាំងពីរនេះ មានហេតុផលគួរថាជាល្អដូចគ្នាពិបាកនឹងបែងចែកថាមួយណាជាមិត្តល្អ មួយណាជាមិត្តអាក្រក់ក្នុងពេលជជែក តែពេលដឹងថាល្អអាក្រក់ គឺពេលឲ្យផលតែប៉ុណ្ណោះ ។ ក្នុងនេះ មិត្តអាក្រក់ពេលមកចង់សេពគប់រាប់អានតែងនិយាយ និងរៀបទង្វើដូចជា :

- ពាក្យសម្តីពីរោះ (ខ្លាចាស់ និងបុរស)

- ពាក្យប្រកបដោយហេតុផល (ចចក និងប្រើស)

- បង្ហាញចំណេះដឹង (មានគ្រប់រឿង)

- បង្ហាញការគោរពឱនលំទោន (រឿងឆ្មា និងត្មាត)

- ចុងក្រោយឲ្យផលជាទុក្ខទោស

- - - - - - -

ចំពោះមិត្តល្អវិញ ពេលមកសេពគប់ ខ្លះមានចំណុចដូចមិត្តអាក្រក់ដែរ តែផលវិញគឺឲ្យជាសុខព្រោះ

- ជួយគ្នាក្នុងគ្រាអាសន្ន

- ដាស់តឿនមិត្ត

- មិនរត់ចោលមិត្ត

- ចែករំលែក

- - - -

នេះជាសេចក្តីសង្ខេបគំនិតដែលខ្ញុំអាន តាមពិតមានចំណុចពិសេសមួយទៀត គឺល្បិចកិច្ចកល តែខ្ញុំមិនលើកមកនិយាយទេ ព្រោះឲ្យស្រប់នឹងចំណងជើងថាគប់មិត្ត ទើបនិយាយត្រឹមនេះ ។ ថ្ងៃក្រោយមានឱកាសនឹងវិភាគតាមទ្រឹស្តីមួយៗ ។

សូមបញ្ជាក់នេះជាសង្ខេបតាមគតិខ្ញុំ កុំយកជាការ ព្រោះបើបងបង្អូនអានអាចនឹងយល់ផ្សេងពីខ្ញុំ ហើយសង្ខេបមានគំនិតល្អផ្សេងមួយបែបទៀតក៏អាចថាបាន ៕